Ar ddiwedd eu hail dymor yn y Gynghrair Genedlaethol
gorffennodd Pwllheli unwaith yn rhagor y tîm Gogleddol gorau,
camp nid ansylweddol i Glwb sy’n recriwtio chwaraewyr o gylch bychan
i gymharu â thimau eraill.
Cafwyd tymor caled yn ôl y disgwyl gyda’r trafeilio diddiwedd
yn parhau i fod yn broblem sylweddol. Ar ôl tymor mor flinedig
mae gan y Clwb y daith i’r Unol Daleithiau i edrych ymlaen ati.
Fe rydd y saib gyfle i bawb adfer ac i edrych ar gryfderau’r garfan. Mae’r pac wedi datblygu llawer o dan
hyfforddiant Denleigh Isaac ond bach iawn oedd y gwelliant a
welwyd ymysg y cefnwyr er gwaethaf y dalent lleol sydd ar gael.
Doedd y sustem rota ddim yn llwyddiant ychwaith ac fe fydd
rhaid scrwtineiddio’r broses o ddewis y tîm ac edrych ar
gyfansoddiad y pwyllgor dewis cyn y tymor nesaf.
Mae’r ymrwymiad a ddisgwylir gan y chwaraewyr a’r hyfforddwyr
fel ei gilydd yn cynyddu drwy’r adeg ac mae’n amhosib i Glwb
fel Pwllheli feddwl am dalu chwaraewyr. Serch hynny mae yna
ddealltwriaeth na ddylai neb fod allan o boced. Y tîm cynta’
ydi ffenestr siop y Clwb ac mae’n bwysig fod adnoddau’n cael
eu sianelu tuag at feithrin yr adnodd yma.
Gyda phenodiad gweinyddwr fe all Pwllheli unwaith eto
ganolbwyntio ar chwilio am nawdd fydd yn hyrwyddo’r gêm.
Gallwn yn awr edrych ar ffyrdd o ariannu aros dros nos cyn
rhai o’r gemau i ffwrdd o gartref a hefyd cyflenwi dillad
chwarae a.y.
Gyda sustemau a chyfleusterau sydd gyda’r gorau yng Ngogledd
Cymru mae’n rhaid bod y Clwb yn gwneud rhywbeth yn iawn ond
mae yna wastad angen ysgogiad i wella ymhellach.
