Yn dilyn tymor caled yn y Gynghrair Heineken roedd swyddogion Pwllheli’n dal i gredu fod y Clwb wedi gwneud y peth
iawn ac wedi elwa llawer iawn o’r profiad. Er gwaethaf yr holl drafeilio ni welai'r ysgrifennydd, Bryn Martin unrhyw opsiwn
ond i barhau.
“Tydi aros yn yr unfan ddim yn opsiwn. Mae’r rhaid symud ymlaen gyda’r amser a’r system Gynghrair. Ond wedi gwneud
y penderfyniad mae’n anodd mynd yn ôl.” meddai.
“Does dim amheuaeth mai’r elfen trafeilio yw’r broblem fwyaf, a’r gobaith ydi y gwnaiff URC bopeth i esmwytho pethau.
Petai Pwllheli, Wrecsam, Yr Wyddgrug ac efallai un tîm arall o’r Gogledd yn yr un Adran y tymor nesaf mi fasa pethau’n
llawer haws.” oedd un cynnig ganddo.
“Byddai cymryd ychydig o amser wrth baratoi’r amserlen fel bod y tripiau hir yn cael eu rhannu allan hefyd yn help.”
“Ond yr unig ffordd i wella yw wrth chwarae yn erbyn timau cryfach a dysgu o hynny. Mae pawb yn siomedig ofnadwy lwyddo i
aros i fyny yn Adran 5, ond edrychwn ymlaen at gymryd ein lle yn Adran 6 y tymor nesaf gyda’r bwriad o symud yn ôl i fyny
yn syth. Rhaid peidio anghofio ein bod ni o’r Gogledd wedi bod yn crefu am gael chwarae mewn Cynghrair genedlaethol.”
“Ddyliwn ni ddim bod yn cwyno gormod am fod y safon yn uwch na’r disgwyl, ei bod hi’n rhy galed, rhy flinedig ac yn rhy
bell i drafeilio.”
Roedd Wil Martin hefyd yn edrych ymlaen at y tymor newydd wrth adlewyrchu ar dymor mwyaf y Clwb hyd yma.
“Rydan ni i gyd, bob un ohonom ni wedi dysgu llawer iawn dros y tymor ac mae pawb yn ddyledus dros ben i’r chwaraewyr,
am y teyrngarwch a’u ffyddlondeb pan oedd pethau yn galed. Gall bawb edrych yn ôl gyda balchder ac i’r dyfodol gyda hyder.
Mae ganddo ni sgwad ifanc iawn yma a does dim rheswm pam na allwn edrych ymlaen am ddyfodol disglair
dros ben.”
