Yn ymwybodol na fyddai’r Clwb Rygbi’n ffynnu heb gartref parhaol, a’r gobaith o gael chwarae ar y Rec yn ansicr aeth y pwyllgor o gwmpas chwilio am lecyn o dir. Methwyd a chael gafael ar ddim o fewn y dref ond roedd Mr Anthony Jones, Penmaen wedi dangos diddordeb i gynnig les ar naw acer o dir ym Modegroes, ar gyrion Efailnewydd at ddefnydd y Clwb.

Cafwyd y syniad yn fuan iawn y byddai’n fanteisiol i ymuno a’r Clwb Criced. Symudwyd yn sydyn, ac erbyn mis Hydref 1972 roedd y Clwb Criced wedi datgan diddordeb i ymuno mewn egwyddor.

Trefnwyd cyfarfod gyda Mr Sam Griffiths, cynrychiolydd y Cyngor Chwaraeon ac aethpwyd ag ef o gwmpas Bodegroes. Cadarhaodd y byddai’r Cyngor yn edrych yn ffafriol ar Glwb aml bwrpas ac y byddai grantiau sylweddol yn bosibl i gynllun o’r fath.

Yn y cyfamser anfonwyd dirprwyaeth i gyfarfod y Cyfarwyddwr Addysg i geisio caniatâd i chwarae gêmau cartref a’r gaeau Ysgol Glan y Môr.

Ffurfiwyd Clwb Chwaraeon Pwllheli ar 7fed o Awst 1973, gyda Pwyllgor Llywio o dan gadeiryddiaeth Mr Eric Lewis yn gyfrifol am ddatblygu syniadau ar gyfer datblygu’r safle i’w rhoi gerbron Pwyllgor Blynyddol y Clwb ym mis Mawrth 1974.

O fewn chwe mis ac fel canlyniad i lawer o waith caled gan nifer o bobl roedd cynlluniau ar gyfer gosodiad y caeau a thŷ clwb newydd wedi’u paratoi, ynghyd a manylion drafft o gyfansoddiad y Clwb. Sicrhaodd yr holl ymroddiad bod gêmau rygbi yn bosibl ym Modegroes yn ystod tymor 1973-74.

Dyma oedd gan R J M Thomas, capten y Clwb i’w ddweud ar ddiwedd yr ail dymor.

"Cychwynnodd y tymor ar nodyn uchel gyda’r tîm cyntaf yn ennill yn erbyn ‘yr hen elyn,’ Llangefni gan ddilyn gyda buddugoliaeth lethol gartref yn erbyn clwb newydd o Benrhyndeudraeth. Roedd lwc yn ein herbyn yn y gêm nesaf yn Nolgellau gyda dwy gic cosb yn fuan yn y gêm yn selio ffawd y tîm, gêm glos ddaeth ag atgofion i’r meddwl o’r golled o un pwynt yn y gêm gyffelyb y tymor blaenorol."

"Chafwyd mo’r un hwyl weddill y tymor. Ar ôl bod i lawr o 22-0 ar hanner amser yng Nghaergybi yng Nghwpan Gogledd Cymru cwffio yn ôl yn yr ail hanner a dim ond colli yn y diwedd o 22-18. Methu hefyd ar y glwyd gyntaf yng Nghwpan y Bragwyr, yn erbyn Dolgellau, a’r siawns o ddenu un o glybiau mawr De Cymru i Fodegroes wedi diflannu, am y tymor yma beth bynnag. Gwell fyddai peidio sôn am y golled yn Rhuthun!"

Cafodd y capten, Geraint Lloyd Williams, anaf drwg a bu’n rhaid iddo stopio chwarae a rhoi fyny’r gapteiniaeth oherwydd hyn. Roedd hyn yn golled fawr i’r tîm, ond methwyd a chadw Gerry draw o Fodegroes yn hir iawn.

Mae’n rhaid gwneud sylw yma o chwaraewyr dŵad cyntaf y clwb. Daeth Eric Bennett drosodd am ychydig wythnosau i wylio’r Crysau Duon ar eu taith ym Mhrydain a gorffen i fyny yn chwarae i Bwllheli. Mae yna son na fu Bangor yr un fath ar ôl ei ymweliad yno! Hefyd, cafodd y Clwb y fraint o gael Barry o Awstralia yn aelod o’r tîm yn ystod y tymor.

Methwyd a chynnal y brwdfrydedd a ddangoswyd yn y sesiwn ffitrwydd cyntaf pan welwyd dros 35 o chwaraewyr yn bresennol. Efallai bod gan hyn rywbeth i’w wneud a’r ffaith bod yr ymarferion hyn yn cymryd lle ar fore Sul. Mae pethau’n argoeli’n well ar nosweithiau Iau yn Ysgol Botwnnog. O dan law feistrolgar Len Humphreys mae lefel ffitrwydd yr hogia wedi codi’n sylweddol, ond mae angen cael presenoldeb pawb yma hefyd.

Dangosodd adroddiad ariannol y clwb a gyflwynwyd gan y trysorydd ar 28ain Chwefror 1974 fod yna falans dros wariant o £199.65 am y cyfnod. O gysidro costau o £364.08 am waith ar y cae, £123.76 am grysau newydd a £74 am hurio bysys i gêmau i ffwrdd roedd yn eithaf bodlon ar bethau. Cyfanswm gwariant y Clwb am y cyfnod 1af Medi 1973 i 28ain Chwefror 1974 oedd £927.83.

Cynhaliwyd Pwyllgor Blynyddol cyntaf Clwb Chwaraeon Pwllheli ar Fawrth 27ain 1974 gydag adroddiad y Cadeirydd Mr Eric D Lewis yn amlinellu’r sefyllfa fan belled.

"Mae dyled y Clwb yn anferth i Mr A J M Jones yn cytuno i lesu’r tir i’r Clwb a hynny ar gostau tu hwnt o resymol. Daeth ansawdd y safle’n amlwg dros y misoedd diwethaf, er yr holl law parhaodd y caeau mewn cyflwr da iawn." meddai Mr Lewis

Soniwyd hefyd am haelioni nifer fawr o ŵyr busnes y dref a fu mor haul gyda rhoddion ariannol a defnydd o gyfleusterau i gynnal cyfarfodydd ac yn y blaen, yn ogystal ag ymroddiad y pwyllgor gweithgar.

Cadarnhaodd yr ysgrifennydd, Mr R J Bovill yn ei adroddiad ef i’r pwyllgor fod cynlluniau wedi’u paratoi ar gyfer adeiladu tŷ clwb. Daeth y tendr gwreiddiol i mewn dros £24,000, ffigwr a oedd yn ormod o faich i’w gynnal. Yn dilyn trafodaethau pellach penderfynwyd symud ymlaen ag adeiladu cragen o ddefnyddiau traddodiadol yn cynnwys ystafelloedd newid ac ystafell Clwb am swm sylweddol is na’r amcangyfrif gwreiddiol. Rhydd y cynlluniau’r posibilrwydd o ymestyn yn y dyfodol pan fydd amgylchiadau’n caniatáu.