Cynhaliwyd cyfarfod o bwyllgor gweithredol y gynghrair yn y Bermo o dan lywyddiaeth Mr T J Williams, Pwllheli yng
nghanol mis Awst. Cadarnhawyd bwriad y timau canlynol i ymuno am dymor 1920-21 :Bala, Bermo, Criccieth, Dolgelley,
Harlech, Pwllheli a Thywyn.
Cadarnhawyd hefyd y swyddogion ar gyfer y tymor.
Llywydd :
Mr Harrison, Rheolwr Y Cambrian News, Aberystwyth.
Is-lywyddion : Uwch-gapten Passingham, Bala; Uwch-gapten Breen Turner,Pwllheli;
Capten Wynne Jones, Dolgelley; Dr Davies, Towyn; Dr Livingstone Davies,
Criccieth; Mr D Llew Hughes, Porthmadog; Mr Du Pledge, Bala; Mr Read,
Golygydd Y Cambrian News, Aberystwyth; Mr George Evans, Y Bermo;
Mr George Davison, Harlech.
Cadeirydd : Mr T J Williams, Pwllheli
Is-gadeirydd : Y Parch H Williams, Curad, Y Bermo
Trysorydd : Mr J A Stokes, Harlech
Ysgrifennydd : Mr Percy Parry, Y Bermo
Ysg. Cyn. : Mr J R Humphreys, Y Bermo
Cynhaliwyd cyfarfod blynyddol tîm pêl-droed Pwllheli yng Nghlwb y Ceidwadwyr ar y 24ain o Fedi o dan lywyddiaeth
Mr W W Dobson.
Etholwyd y swyddogion canlynol :
Llywydd :Mr R R Thomas
Is-lywyddion :Mr W B Roberts, Rhyllech; Uwchgapten R Breen Turner;
Meistri G F C Yale a Mr R Roberts,(Y Maer.)
Cadeirydd :Mr W W Dobson
Trysorydd :Mr D Glyn Owen
Ysgrifennydd :Mr Robert Owen
Pwyllgor :Meistri F Bowman, F Pope, W M Toleman, H Hughes, W Robyns Owen,
F E Young, H S Edwards, W R Williams, H H Williams, David Williams,
Humphrey Jones, T Wilkinson, Watson ac T Williams.
Derbyniwyd cais Pwllheli i chwarae yng Ngynghrair Y Cambrian Coast, gyda’r gêm gyntaf i’w chwarae gartref yn erbyn
Bala ar yr 2ail o Hydref. Roedd Pwllheli ar y blaen ar hanner amser, gyda goliau gan J Morley Edwards a Tudor Jones.
Cafwyd gêm galetach yn yr ail hanner yn enwedig yn y munudau diwethaf ar ôl i Bala sgorio i’w gwneud hi’n dair i ddwy o
blaid Pwllheli, ond methu a sgorio gôl arall wnaeth Bala.
Cynghrair o chew tîm oedd hi yn y diwedd ar ôl i Dywyn dynnu allan, a gwelwyd yn fuan iawn fod gan Y Bermo yn ogystal
a Phwllheli dîm cryf. Erbyn dechrau Rhagfyr roedd y ddau ohonynt ymhell ar y blaen o bawb arall, a’r unig ddau dîm efo
record cant y cant, fan belled. Gwelwyd gêm bwysica’r tymor afallai, yn cymryd lle dros wyliau’r Nadolig. Roedd yna dorf
enfawr ar y Rec ar ŵyl San Steffan yn disgwyl ymddangosiad Y Bermo; a chymerwyd £40 ar y giât, swm eithaf sylweddol
y pryd hynny. Pwllheli ddaeth allan yn fuddugol ar ôl gêm gyffrous, o ddwy gôl i un.
Ar Ddydd Calan roedd gan Y Bermo gêm anodd arall, i ffwrdd o gartref yn erbyn Dolgellau. Mewn gêm galed a chyda thymer
yn gorlifo gwelwyd ymladd yn torri allan yn ystod y gêm a chwaraewyr Dolgellau yn cerdded oddi ar y cae cyn y diwedd. Bu’r
digwyddiadau yn destun ymchwiliad gan Gymdeithas Pêldroed Cymru, ac fel canlyniad gwaharddwyd Harold Meredith, capten
Dolgellau am fis, a’r tirmon, Tom Morris am weddill y tymor. Ceryddwyd gweddill y tîm am eu hymddygiad a gorfodwyd i
bwyllgor Dolgellau roddi rhybuddion o gwmpas y cae ynglŷn ag ymddygiad y clwb ac i sicrhau ffensio digonol o amgylch
y maes.
Dyfarnwyd y dylai cyfrif y gêm fel un gyfeillgar, a threfnu ei hail chwarae yn nes ymlaen yn y tymor. Ennillodd Y Bermo
apêl yn erbyn y penderfyniad a gwelwyd y sgôr o dair i ddwy o’u plaid yn sefyll.
Toedd yna ddim gildio i fod o ochr Y Bermo. Erbyn canol Ionawr roeddynt ar frig y tabl, er wedi chwarae un gêm yn hwy
na Phwllheli, ond gyda chyfartaledd goliau lawer yn well, a byddai’n rhaid i Bwllheli ymweld â’r Bermo eto cyn diwedd y tymor.
Cafodd Y Bermo ysbaid o gêmau cynghrair am ychydig ym mis Chwefror, a hynny i chwarae yng nghwpan Sir Drefaldwyn.
Fel mae’n digwydd eu gwrthwynebwyr oedd Dolgellau, a gydag ond ychydig dros fis wedi mynd ers cwrdd yn y gynghrair roedd
straen yn amlwg yn bodoli ar ddiwrnod y gêm. I wneud pethau’n waeth penderfynodd Mr Morris o Flaenau Festiniog, dyfarnwr
yn y gêm gyntaf, ddod i wylio’r gêm. Gyda’r dorf yn dechrau tynhau fe’i gorfodwyd i adael y cae ar ôl iddo wrthod mynd
o’i wirfodd.
Ni chafwyd fawr o drafferth yn ystod y gêm, ond gyda’r canlyniad ar y diwedd yn ddwy gôl yr un, roedd angen chwarae
amser ychwanegol, ffaith oedd i fod yn amlwg i bawb gan fod yr ornest dair wythnos yn hwyr yn cael ei chwarae. Gwrthododd
Y Bermo wneud hynny a cherdded oddi ar y maes. Penderfynodd pwyllgor y gwpan ddyfarnu’r gêm o blaid Dolgellau, ond enillodd
Y Bermo apêl a wnaethpwyd i Gymdeithas Pêldroed Cymru a chael hawl i’w hail chwarae. Dolgellau enillodd y gêm ar ôl
chwarae goramser dwywaith, a hynny o ddwy gôl i ddim.
Tra’r oedd y drafferth yma’n mynd ymlaen daeth yn amser chwarae rownd gyntaf Cwpan Her y Cambrian Coast. Gwrthododd
Dolgellau hyd yn oed gymryd rhan yn y gystadleuaeth. Dyma sut ddaeth yr enwau allan o’r het.
Bermo Rovers v Bala
Dyffryn v Bermo Town
Porthmadog v Harlech
Criccieth v Pwllheli
Doedd gan Griccieth fawr o siawns yn erbyn Pwllheli ar y diwrnod gan golli’r gêm o bum gôl i un. Porthmadog fyddai
gwrthwynebwyr Pwllheli yn y rownd gynderfynol.
