Wythnos yn ddiweddarach golwg digon gwahanol oedd na ar y lle. Dim ond dau dîm ddaeth i gymryd rhan mewn cystadleuaeth a drefnwyd gan y clwb pêl-droed. Curodd Porthmadog dîm Pwllheli yn y ‘final’ o chwe gôl i ddim.

Ym Mehefin 1900 gwelwyd yr hysbyseb canlynol yr Yr Udgorn.

Roedd yna sôn am dîm Pwllheli North End cyn hyn, yn ôl yn y flwyddyn 1889 gyda chofnod o gêm rhyngddynt â Nefyn, ond dim ar ôl hyn. Mae'n eithaf posibl felly mai enw wedi’i ddefnyddio ar gyfer hysbyseb y gystadleuaeth yn erbyn yr eliffant oedd hwn.

Ffurfiwyd Cynghrair Caernarfon a’r Cylch ar gyfer tymor 1900-01, a chafwyd tarian werth £20 yn rhodd gan y Meistri Solomon Andrews a’i Fab i chwarae amdani. Mr Fred E Young, asiant i’r cwmni oedd yr ysgrifennydd cyntaf. Sefydlwyd y gynghrair newydd yma gyda’r bwriad o wella safon y gêm yn yr ardal a rhoi cyfle i chwaraewyr ifanc lleol i ddatblygu eu sgiliau. Yn ogystal â Phwllheli, y timau eraill i ymaelodi oedd Bethesda, Llanberis, Parc Faenol, Porthmadog a Festiniog.

Colli wnaeth Pwllheli yn eu gêm gynghrair gyntaf erioed yn Festiniog o chwe gôl i ddwy. Mae’r adroddiad ym mhapur lleol Yr Udgorn yn canmol ymdrech y tîm, yn eu dillad streips coch a gwyn, ond yn feirniadol iawn o gyflwr truenus y cae, a oedd yn gwbwl anaddas a pherygl i chwarae arno.

Curo Porthmadog o naw gôl i ddwy wnaeth Llanberis ar yr un diwrnod, felly doedd gobeithion Pwllheli ddim yn uchel wrth ddisgwyl Llanber, eu gwrthwynebwyr cyntaf gartref, wythnos yn ddiweddarach. Roedd Llanberis fel y gallech ddisgwyl yn llawn hyder am fuddugoliaeth, ac o fewn ychydig funudau o ddechrau’r ail hanner roeddynt ar y blaen o dair gôl i un. Gyda’u cefnau yn erbyn y wal brwydrodd Pwllheli'n galed, a gydag ychydig o lwc gymaint â dim arall, sgoriwyd gôl gan Young ac o fewn ychydig funudau un arall gan Evans i wneud y sgôr yn gyfartal. O fewn dim derbyniodd un o chwaraewyr Pwllheli, Morris Williams gic yn ei frest a bu’n rhaid iddo adael y maes am weddill y gêm. Pwysodd Llanberis a’u holl grym am weddill y gêm, ond dal yn gadarn wnaeth yr hogia gan sicrhau canlyniad penigamp a haeddiannol.

Cyn diwedd y flwyddyn gwelwyd yr enghraifft gyntaf o gamymddwyn gan y dorf. Porthmadog oedd yr ymwelwyr yn y Blaenau wythnos cyn y Nadolig. Roedd y sgôr yn sefyll ar gôl yr un ychydig funudau i mewn i’r ail hanner pan sgoriodd y tîm cartref. Pan wrthododd y dyfarnwr ganiatáu’r gôl aeth y dorf o’u co’ ac o fewn ychydig roeddynt wedi’i amgylchynu yng nghanol y cae. Llwyddwyd i gael rhyw lun o drefn ar bethau a chwblhawyd y gêm heb ychwanegiad i’r sgôr. Bu’n rhaid i’r dyfarnwr symud reit sydyn er mwyn osgoi llid y dorf wrth iddynt ei erlid oddi ar y cae.

Erbyn canol mis Ionawr 1901 roedd Bethesda a Pharc y Faenol wedi tynnu allan gan adael dim ond pedwar tîm i gwffio am y teitl. Toedd yna fawr o siâp ar Bwllheli pan ymddangosodd y tabl isod.

Yn anffodus dyma’r tro diwethaf y gwelwyd tabl yn y wasg a toes dim sicrwydd os chwaraewyd y gemau ac os coronwyd pencampwyr o gwbwl. Un peth sy’n eithaf saff yw na wnaeth Pwllheli ennill y teitl.