Fe fyddai’n cymryd rhai blynyddoedd i’r gêm sefydlu’n iawn yn y rhan yma o’r byd, ond erbyn diwedd y ganrif gyda thrafnidiaeth yn gwella a mwy o sylw yn cael ei roi i’r gêm yn y wasg leol ymledodd y gêm i bron bob rhan o’r Sir.

Fel bob tîm arall mae’n siŵr cyfnodau o lanw a thrai a gafwyd dros gyfnod o fwy na chanrif a chwarter. Gwelwyd llawer o fynd a dŵad, chwaraewyr o sawl cyfandir yn troi mewn i chwarae i Bwllheli. Rhai enwau yn dal y llygaid wrth edrych drwy fanylion hen gemau, enwau fel Milton Cato Clarke, T S Stafford, Richard Crawley, Hancock a Jennings. Mae eraill, rhai gwell na'i gilydd, yn parhau yn y cof am eu gallu i hitio pêl neu am y ddawn i fowlio ac eraill yn fythgofiadwy am resymau cwbwl wahanol.

Aeth amryw ymlaen i chwarae i Sir Gaernarfon ac un neu ddau i chwarae i Gymru ar lefel ieuenctid. Aeth un gafodd ei eni yn y dref hyd yn oed ymlaen i chwarae i’r Iwerddon.

Bu’n rhaid symud cartref fwy nag unwaith. Yn y blynyddoedd cynnar, chwarae ar y Morfa ac yng nghyffiniau Glandon a Ffordd Abererch, wedyn symud i’r Rec ac erbyn hyn wedi cartrefu ym Mharc Bodegroes yn Efailnewydd ers dros chwarter canrif. Mae’r clwb yn berchen ar gyfleusterau ac amodau chwarae gyda’r gorau yn y Gynghrair heb os.

Ar hyn o bryd mae safon chwarae yn dda iawn ac yn ystod 2005 cafodd y clwb eu tymor mwyaf llwyddiannus eto, gyda’r ddau dîm yn ennill dyrchafiad i adran uwch, ac mae pethau’n argoeli’n dda am dymor 2006 hefyd.

Oddi tan y gair Hanes fe gewch bori drwy gyfnodau penodol; o’r blynyddoedd cynnar hyd at heddiw.

Ar ben ochr dde i’r dudalen hon mae’r Canlyniadau ac oddi tano’r Newyddion diweddaraf. Cliciwch ar y bocsys i gael mwy o fanylion.

Os oes gennych unrhyw hanesion difyr neu hen luniau yr hoffech eu cynnwys, cysylltwch! Croesawir eich sylwadau. Ar waelod yr ochr chwith o dan y pennawd Gwybodaeth gellwch gysylltu trwy e-bost a gweinyddwr y safle - cliciwch ar y gair Cyswllt.

Gobeithio y gwnewch fwynhau’r cynnwys ac y gwelwn ni chi’n ôl yn fuan.