Gwelwyd newyddion trist yn rhifyn Mai 12fed o'r 'Carnarvon and Denbigh Herald'. Tra'n ymarfer gyda chwaraewyr eraill o glwb Shotton, Sir Fflint, cafodd Herbert Rugman ei daro ar ei frest gan bêl griced. Disgynnodd yn farw yn y fan a'r lle. Herbert oedd unig fab rheolwr y Gwaith Brics lleol.

Ychydig iawn o drefn welwyd ar y gêm ym Mhwllheli yn ystod y blynyddoedd cyn y Rhyfel Byd Cyntaf. O edrych ar y gemau am 1911 yn y wasg, timau Ymwelwyr Pwllheli sydd i'w gweld fwyaf. Er fod yna enwau Cymreig yn eu mysg Saeson mae'n debyg oedd yn gyfrifol am drefnu pethau.