Dechrau digon distaw gafwyd i’r mileniwm newydd. Yn wir dim ond cofnod o un gêm a welwyd yn y wasg leol am y tymor cyfan. Chwaraewyd honno ar yr Adlonfa (Y Rec) fel y’i gelwid bryd hynny. Gêm rhwng y dref a thîm o’r Ysgol Sirol oedd hi. Trechwyd y dref gan gymysgedd o fyfyrwyr ag athrawon oedd yn niferu pedair ar ddeg i gyd. Evan R Jones oedd batiwr gorau’r Ysgol gyda 19 rhediad allan o gyfanswm o 66. Roedd hyn yn union ddwbl cyfanswm y dref, a dim ond E Walters gafodd sgôr dwbl gyda deg o rediadau yn eu batiad.

Mae’n deg dweud fod safon criced ym Mhorthmadog yn y cyfnod yma yn rhagori tipyn ar Bwllheli, ac efallai oherwydd hyn mae yna dipyn mwy o wybodaeth am y Clwb hwnnw yn y wasg. Sefydlwyd tîm yno ddegawdau o flaen Pwllheli mae’n eithaf siŵr, felly nid yw’n syndod eu bod ar y blaen ar ddechrau’r ganrif. Yn amlach na pheidio ail dîm Porthmadog fyddai gwrthwynebwyr y dref, a cholli’r rhan fwyaf o’r gemau rheini fyddai’r hanes.

Roedd ganddynt bwyllgor blaengar ar y pryd, gymaint felly fel y gwelwyd chwaraewr proffesiynol yn cael ei gyflogi yn ôl yn y flwyddyn 1902, mwy na chanrif cyn i Bwllheli feddwl am ffasiwn beth. Fe wnaeth Pwllheli elwa rywfaint o hyn hefyd. Cliciwch ar enw William Pike i ddarllen ychydig amdano.

Mae yna son am rai gemau yn cymryd lle yn ystod tymor 1902, un yn erbyn ymwelwyr o Griccieth a’r llall yn erbyn Llanddyfnan. Cyn cychwyn tymor 1903 mae Mr Harry Morgan un o aelodau’r pwyllgor yn rhoddi bat a phêl i chwaraewyr gorau’r tymor cynt. Mr A S Bradbourne enillodd y bat am y sgôr uchaf a Mr Fred Young y bêl am y ffigyrau gorau am fowlio. Mr Caradog Davies, yr ysgrifennydd gyflwynodd y tlysau a wnaethpwyd gan Meistri Gamage o Lundain. Nodir i’r ddau fod yn falch iawn o’r rhodd.

Gwnaeth pwyllgor Pwllheli gais ym mis Mai 1903 am wasanaeth Pike fel hyfforddwr am ddiwrnod yr wythnos. Daeth ymateb cadarnhaol o Borthmadog, yn caniatáu ei wasanaeth bob pnawn Iau drwy Fehefin a Gorffennaf. Roedd disgwyl i Bwllheli ddod i gytundeb ar delerau gyda Pike ac i dalu premiwm o £1 1s 0c i Borthmadog.

Fel y soniwyd yn barod anaml iawn byddai Pwllheli’n cael y fraint o chwarae yn erbyn tîm cyntaf Porthmadog, a’r ail dîm oedd y gwrthwynebwyr mewn gêm chwaraewyd ym Mis Awst 1904. William Pike oedd y gwahaniaeth rhwng y ddau dîm y diwrnod hwnnw.

Cynlluniwyd gan: Keith Parry Hawlfraint 2006