Yn ogystal â bod yn dymor llwyddiannus i’r tîm roedd hefyd yn uchafbwynt i un batiwr ifanc.
Wrth sgorio cyfanswm o 716 rhediad mewn 16 o gemau llwyddodd Ben Jones i basio cyfanswm Gwyn Jones o 707, record oedd wedi
sefyll ers tymor 1976. Bu’r record o dan fygythiad sawl gwaith ers y flwyddyn honno. Mae Neil Williams wedi sgorio mwy na
chwe chant o rediadau ar bum achlysur gan sgorio 680 yn y flwyddyn 2004. Yr agosaf at dorri’r record hyd eleni oedd Howard
Gill a sgoriodd fel mae’n digwydd union yr un nifer o rediadau a Gwyn, yn 1989.
Mae llwyddiant Ben yn gadarnhad o’i ddatblygiad fel batiwr ac mae ei gyfanswm yn 2005 yn uwch na’r pedwar tymor blaenorol i
gyd gyda’i gilydd. Roedd y record yn edrych mewn perygl am ran fwyaf o’r tymor. Erbyn Gorffennaf 16eg roedd Ben wedi sgorio
cant ddwywaith a thri hanner cant, ond ni ddaeth y record yn rhwydd erbyn y diwedd a gwelwyd tipyn o chwysu cyn cyflawni’r dasg.
Gyda chwe gem yn weddill roedd ei sgôr yn sefyll ar 607, union gant tu ôl i’r record, ond ar ôl dau sgôr o bedair a dwy gêm
yn cael ei chanslo oherwydd glaw roedd popeth yn y fantol, yr oedd dal angen sgorio 30 rhediad yn y gêm derfynol gartref yn
erbyn Hawarden Park ar y 10fed o Fedi. Yn haeddiannol llwyddodd Ben i ychwanegu 38 i’w gyfanswm a phasio’r targed o drwch blewyn.
